Klaviyo fyrir netverslanir

Betri samskipti sem gefa viðskiptavinum ástæðu til að versla meira og oftar hjá þér, en ekki samkeppninni.

Snæþór Guðjónsson - hefur frá 2012 byggt upp og skalað netverslanir sem selja á hörðum alþjóðamarkaði, auk samfélagsmiðla með yfir milljón fylgjendur og bloggsíðna með yfir 100 milljón heimsóknir.

Viðskiptavinur kaupir hjá þér, fær vöruna og er ánægður.

En hvað heyrir hann frá þér eftir það?

Kannski gætirðu hjálpað honum að nýta vöruna betur, svarað spurningum eða bent á eitthvað sem hentar honum.

Svona samskipti sýna að þú hugsar um viðskiptavininn og gefa honum ástæðu til að koma aftur.

Sama á við um þann sem er nýbúinn að kynnast versluninni og vantar aðeins meiri upplýsingar áður en hann ákveður sig.

Klaviyo getur hjálpað þér að halda utan um þessi samskipti, líka þegar mikið er að gera í rekstrinum.

Skoðum þrjár aðstæður þar sem þetta getur nýst og hvað væri skynsamlegt að byrja á hjá þér.

Hvað er Klaviyo og hvernig nýtist það netverslunum?

Klaviyo er markaðskerfi sem heldur utan um póstlistann þinn og gerir þér kleift að senda bæði reglulegar póstherferðir og sjálfvirka tölvupósta.

Það tengist netversluninni þinni, til dæmis Shopify, og getur nýtt upplýsingar um skráningar og kaup til að gera samskiptin við viðskiptavini markvissari.

Þú getur þannig tekið vel á móti nýjum áskrifendum, minnt fólk á ókláruð kaup og fylgt fyrri viðskiptavinum eftir.

Þessir sjálfvirku póstar eru settir upp í svokölluðum flæðum, þar sem ákveðin aðgerð eða skilyrði ræsa sendinguna.

Þú ákveður hvað á að senda, hvenær og til hverra, en kerfið sér síðan um sendingarnar þegar skilyrðin eru uppfyllt.

Það verður auðveldara að sjá ávinninginn þegar við setjum þetta í samhengi við venjulegan dag í netverslun.

Taktu vel á móti fólki á meðan áhuginn er til staðar

Segjum að einhver komi inn á síðuna þína og skrái sig á póstlistann.

Viðkomandi hefur sýnt áhuga en þekkir kannski hvorki fyrirtækið né vörurnar sérstaklega vel.

Með móttökuflæði geturðu byrjað að byggja upp það traust strax.

Fyrsti pósturinn gæti boðið viðkomandi velkominn og hjálpað honum að finna réttu vöruna.

Næsti póstur gæti svarað algengum spurningum eða sýnt umsagnir frá ánægðum viðskiptavinum.

Þannig fær nýr áskrifandi smám saman betri tilfinningu fyrir því hvað þú býður og hvers vegna það gæti hentað honum.

Fyrir þig þýðir það að eftirfylgnin er til staðar, líka þegar mikið er að gera og þú hefur lítinn tíma til að sinna markaðsmálunum.

Svo eru það þeir sem komast næstum alla leið að kaupunum.

Hjálpaðu fólki að klára kaup sem urðu út undan

Viðskiptavinur velur vöru, byrjar að ganga frá pöntuninni og lokar svo síðunni.

Það geta verið margar ástæður fyrir því.

Kannski kom eitthvað upp á, kannski vantaði upplýsingar um afhendingu eða viðkomandi var enn að velta fyrir sér hvaða stærð hentaði.

Ef netfangið liggur fyrir og viðkomandi uppfyllir skilyrði fyrir sendingu getur Klaviyo fylgt þessu eftir með tölvupósti.

Þar má minna á vöruna, auðvelda fólki að halda áfram með pöntunina og bjóða aðstoð ef eitthvað er óljóst.

Ímyndaðu þér til dæmis fataverslun þar sem viðskiptavinur er óviss um stærðir.

Stuttur póstur með hlekk á stærðartöflu og boði um aðstoð gæti svarað einmitt því sem kom í veg fyrir kaupin.

Þess vegna myndum við byrja á að hjálpa viðskiptavininum að taka ákvörðun.

Afsláttur getur átt við í ákveðnum tilvikum, en hann þarf ekki að vera það fyrsta sem þú býður.

Þannig geturðu auðveldað viðskiptavininum að klára kaupin þegar hann er tilbúinn.

En eftirfylgnin á líka erindi eftir að pöntunin er komin.

Gefðu viðskiptavinum ástæðu til að koma aftur

Fyrstu kaupin eru gott tækifæri til að byrja lengra samband við viðskiptavininn.

Góður póstur eftir kaup gæti hjálpað honum að nota vöruna, svarað algengum spurningum eða gefið gagnleg ráð.

Ef þú selur húðvörur gæti það verið einföld leiðbeining um hvernig varan passar inn í daglega rútínu.

Síðar gæti verið viðeigandi að kynna vöru sem passar með fyrri kaupum eða minna á endurpöntun þegar líklegt er að birgðirnar séu að klárast.

Tímasetningin þarf að taka mið af vörunni og því hvernig fólk notar hana.

Klaviyo býður líka upp á flæði til að ná aftur til viðskiptavina sem hafa ekki keypt í ákveðinn tíma.

Fyrir verslunina getur þetta þýtt fleiri endurkaup og sterkara samband við viðskiptavini sem þekkja verslunina og treysta henni.

Það er samt eðlilegt að velta fyrir sér hvort svona eftirfylgni verði of mikil.

Góð eftirfylgni þarf að vera gagnleg fyrir viðtakandann

Póstur með gagnlegum upplýsingum á viðeigandi tíma hefur skýran tilgang fyrir þann sem fær hann.

Þess vegna skiptir máli að hugsa um aðstæður viðskiptavinarins, efni póstsins og hversu oft þú hefur samband.

Sá sem var að kaupa á til dæmis að hætta að fá áminningar um að klára sömu pöntun.

Og sá sem keypti vöru í gær þarf yfirleitt ekki strax áminningu um að kaupa hana aftur.

Réttar stillingar og skýr skilaboð hjálpa þér að halda þessum samskiptum eðlilegum.

Það sama á við um reglulegu póstana sem þú sendir á listann.

Þar geturðu deilt ráðleggingum, kynnt nýjar vörur og svarað spurningum sem hjálpa fólki að velja.

Þannig hefurðu ástæðu til að vera í sambandi líka á milli tilboða.

Byrjaðu á því sem nýtist versluninni þinni núna

Þú þarft ekki að vera með risastóran póstlista til að byrja að hugsa um eftirfylgni.

Það þarf hins vegar að skoða umferðina, stærð listans og fjölda pantana til að meta hversu umfangsmikil uppsetning borgar sig.

Fyrir litla verslun getur verið skynsamlegt að byrja á einföldu móttökuflæði og eftirfylgni með ókláruðum kaupum.

Síðan má bæta við eftir því sem verslunin og listinn stækka.

Þegar flæðin eru komin í gang þarf að fylgjast með viðbrögðum og árangri og uppfæra efni eftir þörfum.

Sjálfvirknin sér um sendingarnar, en góð umsjón hjálpar til við að halda þeim gagnlegum.

Til að sjá hvar þú stendur geturðu byrjað á þessum þremur spurningum:

Fær nýr áskrifandi góða kynningu á versluninni og vörunum?
Er ókláruðum kaupum fylgt eftir með gagnlegum pósti?
Ertu í sambandi við fyrri viðskiptavini á milli tilboða?

Ef eitthvað af þessu vantar gæti verið skynsamlegt að byrja þar.